Viðsjárvert getur verið að leggja sér heimabakaðar kleinur til munns.

„Við getum sagt að við höfum haldið að okkur höndum síðan þetta mál kom upp“, segir Guðlaug Elíasdóttir, formaður Sambands vestfirskra kvenna, í samtali við bb.is á Ísafirði. Þar á hún við það umtalaða mál þegar heilbrigðisfulltrúar hindruðu ekki alls fyrir löngu sölu á kökum sem bakaðar höfðu verið í heimahúsum og ætlunin var að selja í góðgerðaskyni. Slíkt hafði verið stór þáttur í fjáröflun kvenfélaga og fleiri félaga hérlendis í heila öld eða meira. Afrakstur af kökubösurum og kaffisölu kvenfélaganna rann óskiptur til heilbrigðis-, mannúðar-, menningar-, jafnréttis-, uppeldis- og fræðslumála.

Vegna þeirrar hættu sem stafað getur af neyslu þess sem íslenskar húsmæður baka á heimilum sínum þurfa kvenfélög nú að leggja höfuðið í bleyti og finna aðrar fjáröflunarleiðir. Þetta er þó ekki í fyrsta skiptið sem kvenfélögin þurfa að finna nýjar leiðir til að afla fjár. Að sögn Guðlaugar var sala afskorinna blóma eitt sinn mjög góð fjáröflunarleið en svo er ekki lengur því að nú fást þau í flestum stærri matvöruverslunum.

Samkvæmt lögum um matvæli er ólöglegt að baka heima og selja kökurnar í góðgerðaskyni. Stórfelld eða ítrekuð ásetningsbrot á lögunum skulu auk sekta varða fangelsi allt að fjórum árum. Stórfellt ásetningsbrot verður að telja ef heilt kvenfélag tekur sig saman og selur heimabakaðar kökur.