Kræklingasúpa með löngu nafni
Hér kemur uppskriftin að kræklingasúpunni sem Ásta Sjöfn Kristjánsdóttir kennari á Litlu-Grund eldaði fyrir súpufundinn í Króksfjarðarnesi og getið er í fréttinni hér á undan. Þegar höfundur súpunnar var beðinn um uppskriftina var það auðsótt - með þeim fyrirvara, að engin leið væri að tiltaka hlutföllin af neinni nákvæmni. Fólk sem vant er kokkaríi styðst væntanlega við tilfinninguna og reynsluna í þeim efnum. „Bara sitt lítið af hverju,“ segir Ásta Sjöfn, og bætir við:
„Beggi á heiðurinn af kræklingasoðinu, góð ráð fékk ég hjá matreiðslumeistaranum okkar honum Steinari í Álftalandi – og síðan er nauðsynlegt að hafa Guðmund minn til að hræra í pottinum.“
Eyvi í Hólakaupum talar eflaust fyrir munn fleiri gesta á fundinum í Nesi þegar hann segir: „Smakkaðist prýðilega, herramannsmatur, eins og á fínasta veitingahúsi.“
Króksfjarðarnesskynningarfundarkræklingasúpa Ástu Sjafnar
-
Laukur
-
Blaðlaukur
-
Hvítlaukur
-
Tómatpúrra
-
Kræklingasoð à la Beggi
-
Gulrætur
-
Ítalskt sjávarréttakrydd (Pottagaldrar)
-
Rjómi
-
Kræklingur
-
Örlítill fiskikraftur
Laukurinn svissaður á pönnu með örlítilli olíu þar til hann er orðinn mjúkur. Tómatpúrran sett út í og blandað vel saman við. Vatni og kræklingasoði hellt yfir. Gulræturnar settar út í soðið og það látið malla í ca. klukkustund. Grænmetið sigtað frá og súpan þykkt með smjörbollu. Passa að hræra vel í henni þannig að ekki komi kekkir. Þegar súpan er orðin mátulega þykk er grænmetið sett út í aftur og leyft að malla aðeins lengur. Rjóminn er settur út í, ca. 1 hluti rjómi á móti 2-3 hlutum súpa (soð). Ekki sjóða mikið eftir að rjóminn er komin út í. Rétt áður en súpan er borin fram er kræklingurinn settur út í.