Kvenfélagskonur frá Patró í heimsókn
Flugvélar sem tylla sér á Reykhólum eru ekki einu vorboðarnir auk farfuglanna; hópferðabílar eru líka þar á meðal. Nokkru eftir lokun Hólabúðar klukkan fjögur í dag, sem er venjulegur lokunartími á laugardögum yfir veturinn, langaði hóp kvenna frá Patreksfirði að komast í búðina. Reynir og Ása brugðust snarlega við; þetta var fyrsta einkaopnunin í Hólabúð á þessu vori en örugglega ekki sú síðasta. Seinna fóru konurnar á opna húsið á Báta- og hlunnindasýningunni og voru þar ennþá núna um klukkan hálftólf þegar þetta er skrifað og undu hag sínum vel.
Hér var um að ræða rúmlega tuttugu kvenfélagskonur frá Patreksfirði saman á ferð. Vissulega voru þær ekki eina fólkið á opna húsinu. Auk fólks á Reykhólum og úr sveitinni litu þar líka fleiri ferðamenn inn.
Á fyrstu myndinni er rútan við Hólabúð en seinni myndirnar þrjár eru teknar á opna húsinu í kvöld.
Guðný Elínborgardóttir, sunnudagur 08 ma kl: 13:18
Við þökkum fyrir högðinglegar móttökur á Reykhólum. Einnig þökkum frábæra gistiaðstöðu og góðan mat á (Álftalandi) Sennilega ekki rétt nafn á gistihúsinu. Þá þökkum við góðar móttokur í Skálanesi en þar var tekið á móti okkur með sopa og heimagerðu snakki.
Takk kærlega, Kvenfélagið Sif Patreksfirði.