Frumkvöðlum, fulltrúum fyrirtækja og einstaklingum með góðar viðskiptahugmyndir gefst á morgun einstakt tækifæri til að kynna sér stuðningsumhverfi nýsköpunar á Íslandi, allt frá ráðgjöf og fjármögnun til Evrópusamstarfs og tengslamyndunar.

Nýsköpunarmiðstöð Íslands, Rannís, Útflutningsráð og Samtök iðnaðarins standa fyrir kynningunni í tilefni af evrópsku fyrirtækjavikunni, SME WEEK '09. Kynningin verður á Grand Hóteli í Reykjavík kl. 13 þriðjudaginn 12. maí en á meðal þeirra sem kynna þjónustu sína eru:

Byggðastofnun, Ferðamálastofa, Frumtak, Innovit, Kauphöllin, Klak, Matís, Nýsköpunarmiðstöð Íslands, Nýsköpunarsjóður atvinnulífsins, Rannís, Rannsóknaþjónusta Háskóla Íslands, Samtök iðnaðarins og Útflutningsráð.

Þetta er í fyrsta skipti sem haldin verður svo heildstæð kynning á stuðningsumhverfi nýsköpunar á Íslandi og standa vonir til að þetta geti orðið árlegur viðburður.

Gestir eru velkomnir frá kl. 12.30 en formleg dagskrá hefst kl. 13. Pallborðsumræður með fulltrúum fyrirtækja verða haldnar að kynningum loknum. Fulltrúar ofangreindra aðila munu svara fyrirspurnum gesta í básum á meðan á kynningum stendur.

Fundarstjóri verður Þórólfur Árnason, forstjóri Skýrr.

Vinsamlegast tilkynnið þátttöku á evropumidstod@nmi.is.