Bjarni M. Jónsson heldur kynningarfund á Reykhólum á fimmtudaginn, 18. mars, þar sem kynntar verða áhugaverðar hugmyndir um að samþætta veg og virkjun í sameiginlegu mynni Þorskafjarðar, Djúpafjarðar og Gufufjarðar. Þetta er hugmynd sem varð til þegar Bjarni vann að meistaraprófsritgerð við Háskólasetrið á Ísafirði í fyrra. Búið er að stofna sprotafyrirtæki um hugmyndina sem heitir Vesturorka - WesTide ehf. Að því standa í dag, auk Bjarna, Orkubú Vestfjarða, Atvinnuþróunarfélag Vestfjarða og Nýsköpunarmiðstöð Íslands.

 

Bjarni segir mikilvægt að hefja þetta ferli formlega með því að kynna fyrir heimamönnum þær upplýsingar sem liggja fyrir á þessu stigi og hver næstu skref eru. Hann segir einnig mikilvægt að fá að heyra sjónarmið landeigenda, yfirvalda á staðnum og annarra heimamanna og hvað þeir leggja til málanna.

 

Fundurinn verður í Reykhólaskóla og hefst kl. 19.30. Að forminu til felst hann í glærukynningu og umræðum.

 

Á myndinni er sýnd þverun og brú í mynni Þorskafjarðar ásamt virkjun. Í brúnni eru hverflar sem framleiða rafmagn á útfalli. Rafleiðslur í formi jarðstrengja liggja með veginum. Myndin er byggð á gervitunglamynd frá Google. Smellið á hana til að stækka.

 

30.11.2009  180 megavatta hámarksafl frá Þorskafjarðarvirkjun

16.01.2010  Raforkufélagið Vesturorka í burðarliðnum