Víðar en í Bæ í Trékyllisvík leit fyrsta lamb ársins dagsins ljós í fyrradag. Það sama gerðist líka á Stað á Reykjanesi, þar sem lambakóngurinn hefur þegar hlotið nafnið Bjartur. Rétt eins og í Bæ láta heimasæturnar tvær á Stað vel að litlu lömbunum enda víst ekki óvanar slíku. Og rétt eins og í Bæ ber önnur systranna nafnið Aníta.

 

Á myndunum eru systurnar Védís Fríða (átta ára) og Aníta Hanna (sex ára) með Bjart. Þær eru dætur Rebekku Eiríksdóttur og Kristjáns Þórs Ebeneserssonar á Stað.

 

Fyrir stuttu hlaut félagsbúið á Stað viðurkenningu fyrir úrvalsgóða hrúta. Hver veit nema Bjartur komist í þann heiðursflokk í fyllingu tímans?