Loksins komið sumar? Á Dvalarheimilinu Barmahlíð á Reykhólum var í dag sitthvað sem benti til þess. Lambhrúturinn Birkir - sem kominn er með myndarlega hnýfla - leit í heimsókn í síðdegiskaffi í glaðasólskini og þrettán stiga hita. Slíkur hiti mun ekki hafa mælst á Reykhólum fyrr á þessu ári. Í för með hrútnum státna var Indiana Ólafsdóttir. Heimilisfólk og starfsfólk skiptist á að taka Birki í fangið en hann lét sér vel líka og nartaði í nef og gleraugu og hálsakot og raunar allt sem til náðist. Varla hefur þetta verið í fyrsta sinn á lífsleiðinni sem Lilja á Grund hefur látið vel að lambi!

 
Stækkið myndina með því að smella á hana.