Örn Snævar og Margrét.

Hjónin Margrét Guðlaugsdóttir og Örn Snævar Sveinsson skipstjóri fluttust núna um mánaðamótin suður í Hveragerði eftir fjórtán ára búsetu og störf á Reykhólum. „Margrét hefur unnið hér í Barmahlíð í fjölda ára og á skilið lof fyrir sitt flotta starf,“ segir Helga Garðarsdóttir hjúkrunarforstjóri. „Hún var alltaf tilbúin að aðstoða við alls kyns saumaskap á fatnaði heimilismanna, þó það væri ekki beint í hennar verkahring. Hún var duglegur starfsmaður sem lét sér annt um alla sem nærri henni voru. Við starfsfólkið hér í Barmahlíð viljum kveðja hana og óskum henni alls hins besta í því sem hún tekur sér fyrir hendur,“ segir Helga.

Af árunum fjórtán á Reykhólum var Örn Snævar fyrstu sjö árin stýrimaður en þau seinni sjö skipstjóri á skipum Þörungaverksmiðjunnar, Karlsey og síðan Gretti. Í fyrstu vann Margrét á leikskólanum á Reykhólum en síðan á Dvalar- og hjúkrunarheimilinu Barmahlíð og jafnvel á báðum stöðum jafnhliða.