Vestfirsku göngukortin sjö.

Ferðamálasamtök Vestfjarða hafa á undanförnum árum gefið út göngukort, 7 talsins, þar sem gönguleiðir á Vestfjörðum eru skráðar og fólk getur skellt sér í skemmtilegar göngur. Nú er komið að því að gefa út á nýjan leik kort nr. 1 (Hornstrandir) og nr. 3 (Strandir norðan Hólmavíkur og Inndjúp). Mikilvægt er að leiðrétta þær leiðir sem eru ekki lengur færar og jafnframt að skrá inn nýjar leiðir.

Harpa Eiríksdóttir, gjaldkeri Ferðamálasamtakanna, sér um endurútgáfuna fyrir samtökin. Nú biðlar hún til þeirra sem hafa notað kortin og tekið eftir villum í þessum tveimur kortum, og vissulega líka í hinum, til að geta leiðrétt villur og fengið ábendingar til að taka út leiðir eða setja inn leiðir.

Hægt er að senda ábendingar á info@reykholar.is.

Einnig ef fólk vill auglýsa á kortunum. þá endilega senda póst.

Kortin verða væntanlega send í prentun eftir viku eða svo, þannig að óskað er eftir athugasemdum og ábendingum sem allra fyrst.