Anna Greta Ólafsdóttir skólastjóri á Reykhólum.

Skólahald leikskóladeildar Reykhólaskóla að loknu sumarfríi hefst kl. 7.45 á föstudaginn eftir viku, 16. ágúst. Grunnskóladeild tekur síðan til starfa í vikunni þar á eftir eða miðvikudaginn 21. ágúst kl. 8.30. Þá verður fyrst stutt skólasetning á sal en eftir það fara nemendur með umsjónarkennurum í sínar stofur þar sem afhentar verða stundatöflur ásamt innkaupalistum. Foreldrum barna í fyrsta bekk er boðið í kaffi og spjall með skólastjóra að skólasetningu lokinni. Kennsla hefst strax að lokinni setningu eins og venja er.

„Við hlökkum til að hitta nemendur hressa og endurnærða eftir gott sumarfrí og tilbúna að taka námið föstum tökum að nýju,“ segir Anna Greta Ólafsdóttir skólastjóri.