Opnað hefur verið fyrir skráningu á vefnum í Lífshlaupið 2017 sem hefst á miðvikudag, 1. febrúar. Þetta er heilsu- og hvatningarverkefni Íþrótta- og Ólympíusambands Íslands fyrir alla aldurshópa og kannast margir við það frá undanförnum árum. Kjörorð Lífshlaupsins er Þín heilsa - Þín skemmtun.

Lífshlaupið er:

1. Grunnskólakeppni fyrir 15 ára og yngri í tvær vikur í febrúar.
2. Framhaldsskólakeppni fyrir 16 ára og eldri í tvær vikur í febrúar.
3. Vinnustaðakeppni í þrjár vikur í febrúar.
4. Einstaklingskeppni þar sem allir geta tekið þátt og skráð sína daglegu hreyfingu allt árið.

Skrá má alla hreyfingu ef hún nær minnst 30 mínútum samtals á dag hjá fullorðnum og minnst 60 mínútum samtals á dag hjá börnum og unglingum. Tímanum má skipta í nokkur styttri tímabil yfir daginn, svo sem 10 til 15 mínútur í senn.

Vinnustaðir, skólar og einstaklingar eru hvattir til að taka þátt og nota þannig tækifærið til að efla líkama og sál með því að hreyfa sig daglega.

Vefur Lífshlaupsins