Séð til Hólmavíkur / Jón Halldórsson.

Sveitarstjórn Strandabyggðar ákvað í síðustu viku að ganga til viðræðna við Hornsteina, fasteignafélag, um kaup á íbúðum í þriggja íbúða raðhúsi sem fyrirtækið áformar að byggja á Hólmavík. „Mikil eftirspurn er eftir húsnæði í sveitarfélaginu og hefur sú eftirspurn aukist jafnt og þétt á síðustu misserum. Fjölskyldur hafa ítrekað lent í vandræðum vegna húsnæðisleysis á Hólmavík og algengt að fólk hafi bjargað sér tímabundið með búsetu inni á ættingjum, í sumarhúsum og jafnvel á gistiheimilum á svæðinu“, segir á vef Strandabyggðar.

Fyrir helgina var hér á Reykhólavefnum greint frá tilfinnanlegum húsnæðisskorti á Reykhólum.

„Um þessar mundir er fjöldi fjölskyldna og einstaklinga að leita eftir húsnæði í sveitarfélaginu, bæði fólk sem þarf að flytja milli húsnæða á Hólmavík en einnig fólk sem hefur áhuga á að flytja í Strandabyggð frá öðrum sveitarfélögum. Þá hafa fyrirspurnir eftir byggingarlóðum aukist og hefur byggingarfulltrúa verið falið að undirbúa auglýsingu á þeim lóðum sem til eru og skoða frekari möguleika á deiliskipulagningu fyrir íbúðarhúsnæði í sveitarfélaginu“, segir þar einnig.

► Strandabyggð

► Ljósmyndablogg Jóns Halldórssonar á Hólmavík