Líklega fyrsta pylsuveisla ársins á Reykhólum
Sumarið er komið. Í dag á sælum sunnudegi hefur verið glaðasólskin með hægri austanátt við innanverðan Breiðafjörð og fuglasöngur hvarvetna. Efnt var til pylsuveislu að Reykjabraut 1 á Reykhólum og ekki ósennilegt að það hafi verið fyrsta veislan af því tagi utanhúss á þessum slóðum þetta árið. Að minnsta kosti ein af þeim allra, allra fyrstu.
Þarna hefðu eftirfarandi ljóðlínur sr. Matthíasar Jochumssonar frá Skógum í Þorskafirði átt vel heima þótt af öðru tilefni hafi hann kveðið svo (Ránarklæði Breiðafjarðar blasa við frá Reykhólum):
Lýsti sól
stjörnustól,
stirndi á Ránarklæði.
Skemmti sér
vor um ver,
vindur lék í næði.
Skáldið (og sýslumaðurinn) Jón Thoroddsen segir á einum stað í sögunni Pilti og stúlku: „Sólin blessuð leið frá austri til suðurs og frá suðri í vesturátt ...“
Svo lengi stóð hún að vísu ekki, pylsuveislan við Reykjabrautina, en samt má á sunnudegi (sólardegi) alveg minnast þessara orða hjá skáldinu frá Reykhólum.
Hlynur Þór Magnússon, sunnudagur 29 aprl kl: 18:38
Varðandi ofanritað úr Pilti og stúlku eftir Jón Thoroddsen má minna á það sem Megas orti um sama efni - varla verður talað markvissar um einfalda hluti: Sólin kemur upp í austri / og í vestri sest hún niður.