Áhugafólk um bættar samgöngur á Vestfjörðum undir forystu Harðar Sigtryggssonar á Þingeyri hefur hrundið af stað söfnun undirskrifta til að skora á Alþingi og ríkisstjórn að færa jarðgöng milli Dýrafjarðar og Arnarfjarðar framar á verkefnalista. Þau myndu leysa veginn um Hrafnseyrarheiði af hólmi, en hann er ófær marga mánuði á ári. Eins og hér kom fram var á föstudag byrjað að ryðja heiðina þetta árið. Undirskriftalistar liggja frammi á mörgum stöðum allt frá Bolungarvík og Ísafirði og suður í verslunina Hólakaup á Reykhólum. Textinn er svohljóðandi: 

• Við skorum á Alþingi Íslendinga og ríkisstjórn Íslands að færa Dýrafjarðargöng framar á verkefnalista samgönguáætlunar 2012-2024 svo þau verði næsta jarðgangaframkvæmd. Jafnframt minnum við á fyrirheit ríkisstjórnarinnar um að veita Vestfjörðum forgang við uppbyggingu samfélagslegra innviða til þess að bjarga byggð og atvinnulífi.
• Dýrafjarðargöng hafa verið metin brýnasta samgönguframkvæmdin frá því að jarðgangaáætlun kom fram árið 2000. Dýrafjarðargöng og heilsársvegur um Dynjandisheiði eru forsenda byggðaþróunar og atvinnulífs á norðan- og sunnanverðum Vestfjörðum. Þau opna leið milli byggðarlaga þar sem engin vegtenging er stóran hluta árs, veita þar með aðgengi að opinberri þjónustu, t.d. framhaldsskóla og fjórðungssjúkrahúsi, opna fyrir vöruflutninga og verslun milli svæða. Engin jarðgangaframkvæmd sem nú er til umræðu getur talist brýnni né þýðingarmeiri fyrir afdrif byggðar og atvinnulífs í einum landshluta.
• Við skorum á stjórnvöld að efna nú fyrirheit sitt við Vestfirðinga með því að hraða gerð Dýrafjarðarganga. 

Samkvæmt núgildandi áætlun á að hefja vinnu við Dýrafjarðargöng árið 2018 eða eftir sex ár. Gera má ráð fyrir að þá yrðu þau tilbúin árið 2021 eða þar um bil.