Á vef Ríkisútvarpsins birtist í gær eftirfarandi frétt: „Lagið um litlu fluguna var fyrst flutt opinberlega á jólaballi í Reykhólahreppi fyrir sextíu árum. Í kvöld verður það flutt í Kópavogi á tónleikum með lögum Sigfúsar Halldórssonar. Þar syngja Egill Ólafsson, Andrea Gylfadóttir og Stefán Hilmarsson vinsælustu lög Sigfúsar. Þó að Litla flugan minni lítið á jólin þá var lagið líklega fyrst sungið opinberlega á jólaballi í Reykhólahreppi árið 1951. Þar í sveit samdi Sigfús lagið og börnin á bænum voru ekki lengi að læra textann. Á jólaballinu það ár var lagið sungið og öll sveitin tók undir. Sigfús spilaði svo lagið og söng í útvarpsviðtali hjá Pétri Péturssyni og lagið varð samstundis þekkt.“

 

Þannig var fréttin á ruv.is. Fyrir nokkrum dögum hringdi kona frá Ríkisútvarpinu í umsjónarmann Reykhólavefjarins. Hún hafði „gúglað“ Litlu fluguna og fundið þessa frétt á vef Reykhólahrepps og spurði hvort ekki væri í lagi að notast við þær upplýsingar sem þar koma fram. Svörin voru þau, að slíkt væri í góðu lagi!