Tvö leiklistarverkefni eru núna á döfinni í Reykhólahreppi. Í Reykhólaskóla er verið að æfa leikritið um Litlu-Ljót og taka allir nemendur skólans þátt í því. „Flottur söngur, mikil gleði og líka mikil alvara í þessu verki“, segir Solla Magg leikstjóri. Steinunn Rasmus annast söngstjórnina. „Ég get lofað ykkur því að þetta verður mikil sýning á árshátíð skólans“, segir Solla. Fyrstu æfingar hjá Leikfélaginu Skruggu í Reykhólahreppi eru líka byrjaðar.
 
„Þar eru frábærir söngvarar sem syngja lög og ljóð bræðranna Jóns Múla og Jónasar Árnasona, en ekki er enn búið að ákveða hvenær fyrsta sýningin verður“, segir Solla Magg. Þar er hún einnig leikstjóri en Steinunn Rasmus annast undirleik.

 

Þegar krakkarnir í Reykhólaskóla verða farnir að æfa í búningum innan tíðar má vænta hér mynda af þeim og líka frekari frétta af báðum verkefnunum.