Í tilkynningu frá Vegagerðinni í dag segir að núna sé búið að opna Þorskafjarðarheiði fyrir umferð en á henni sé 5 tonna ásþungi. „Það er enn vor í henni, smávegis aurbleyta og frostleysingar en hún ætti samt að vera fær flestum bílum“, segir Jón Hörður Elíasson hjá Vegagerðinni.

 

Heiðin er opnuð óvenju seint að þessu sinni miðað við hve langt er liðið á sumarið. „Þetta er svona í seinna lagi“, segir Jón Hörður. Undanfarin ár hefur ekki verið gert ráð fyrir að heiðin sé mokuð og því er hún opnuð seinna á vorin en áður var venja. Fyrir þremur árum var hún opnuð í lok maí en í fyrra handmokaði starfsfólk í Bjarkalundi síðustu snjóhöftin.