Lundaveiði í Breiðafjarðareyjum hrakar ár frá ári
„Þetta hefur farið versnandi með hverju ári", segir Aðalsteinn Valdimarsson á Reykhólum um lundaveiðina í Breiðafjarðareyjum. Hann er nýkominn úr árlegri lundaveiðiferð ásamt félögum sínum og segir að mjög lítið hafi verið af lunda og mun minna en í fyrra. „Eins og Ævar Petersen sagði núna um daginn hafði sílið greinilega horfið og lundinn farið frá og nokkuð af kofunni drepist", segir Aðalsteinn. Þeir félagar fóru út í eyjar á föstudag og voru við veiðar frá laugardegi og fram á miðvikudag.
„Framan af sáum við fáa fugla með síli. Síðasta daginn fórum við snemma um morguninn og þá var talsverður vindur og gott flug og miklu meira af lunda en fram að því. Fuglinn var áberandi betur lestaður og virtist vera með mikið og gott síli. Það stóð þó ekki nema þrjá-fjóra tíma og þá hvarf fuglinn aftur að mestu."
Aðalsteinn kvaðst hafa heyrt í fólki sem fór í sömu eyju í gærmorgun og þá hafi þetta verið á sama veg. Um morguninn var gott flug og fuglinn með mikið síli en svo var það búið.
Í meira en tuttugu ár hefur Aðalsteinn farið á hverju sumri á lundaveiðar úti í eyjum ásamt Pétri Sveinssyni, fyrrum lögreglumanni á Patreksfirði og síðar í Reykjavík, en hann er ættaður úr Breiðafjarðareyjum eins og Aðalsteinn. Alltaf hafa einhverjir fleiri verið með þeim í þessum ferðum, yfirleitt tveir til fjórir í viðbót. „Núna vorum við fjórir saman og höfðum ekki nema 454 lunda. Meðan það var einhver lundi hefði það verið meðaldagur hjá einum manni. Þetta fer stöðugt versnandi, hvað svo sem menn segja um svartan sjó af lunda. Ég sé ekki svartan sjó af lunda."
Þeir félagarnir voru að mestu í Langey við veiðarnar eins og undanfarin ár. „Fyrrum vorum við alltaf í Oddleifsey, sem tilheyrir Hergilseyjarlöndum, en svo virtist minna um geldfugl þar. Við skruppum þangað einn dag núna og hann var mjög lélegur. Eini tíminn núna sem var nokkuð eðlilegur var í Langey á miðvikudagsmorgun og minnti svolítið á lundaveiðina fyrrum, þó að miðað við tímann hafi aflinn ekki verið neitt í samanburði við það sem áður var."
Aðalsteinn og félagar veiða helst geldfuglinn. „Ef við fáum fugl í háfinn sem við teljum okkur sjá að sé hreiðurfugl, þá sleppum við honum."