Ljósm. Rebekka Eiríksdóttir.

« 1 af 4 »

Rebekka Eiríksdóttir á Stað í Reykhólasveit tók núna í morgun meðfylgjandi myndir af fugli sem hún telur að sé gráhegri og getur ekki talist algeng sjón hérlendis. Mynd nr. 1 er mjög stækkuð út úr mynd nr 2 (sem sjálf er stækkuð úr upphaflegu myndinni). Myndir nr. 3 og 4 eru líka mikið stækkaðar vegna fjarlægðarinnar og þess vegna ekki mjög skýrar.

Um gráhegra segir svo á eldri vef Náttúrufræðistofnunar Vesturlands árið 2002 eða fyrir ellefu árum, en þar er greint frá því að gráhegri hafi sést í Stykkishólmi 24. október (sama dagsetning og í dag) og síðan næstu tíu dagana eða svo:

• Gráhegrar eru stórir og tilkomumiklir vaðfuglar. Þeir verpa ekki á Íslandi en nokkrir flækjast hingað á hverju hausti og sjást þá helst í fjörum og við ár og vötn sem ekki frjósa. Þeir eru háfættir og hálslangir, ljósir á kvið en með gráa vængi. Einnig má sjá svartar flikrur á kvið og höfði. Á flugi eru þeir fremur þunglamalegir en eru auðþekkjanlegir á breiðum og löngum vængjum, sem minna reyndar dálítið á arnarvængi nema bognari. Að auki greinast þeir frá örnum á flugi á löngum fótum sem skaga aftur fyrir stélið. Vænghafið er 155-175 cm en standandi eru þeir 84-102 cm á hæð, eftir því hvort hálsinn er uppréttur. Talið er að flestir gráhegrar komi hingað frá Noregi en hafi villst af leið sinni suður til Mið-Evrópu.