Bæjarstjórn Ísafjarðarbæjar lýsir yfir eindregnum stuðningi við bæjarstjórn Vesturbyggðar og önnur sveitarfélög á sunnanverðum Vestfjörðum í baráttunni fyrir endurnýjun Vestfjarðavegar í vesturhluta Reykhólahrepps. Tillaga þessa efnis var samþykkt á síðasta bæjarstjórnarfundi. „Samgönguyfirvöld verða að setja þessa bráðnauðsynlegu framkvæmd í tafarlausan forgang til að koma sunnanverðum Vestfjörðum í mannsæmandi vegasamband hið fyrsta“, segir í samþykktinni. Um er að ræða vegarkaflana frá Þorskafirði að Skálanesi og frá Eiði við Vattarfjörð að Þverá í Kjálkafirði.

 

Bæjarstjórn Ísafjarðarbæjar tekur heils hugar undir röksemdir bæjarstjórnar Vesturbyggðar og skorar á Kristján Möller samgönguráðherra að vinna verkefnið með hraði í þeirri mynd sem heimamenn leggja áherslu á. Bæjarstjórn Ísafjarðarbæjar ítrekaði einnig mikilvægi þess að opinber verkefni séu unnin á landsbyggðinni.
 
„Þetta á sérstaklega við þegar um er að ræða ný verkefni. Hafa ber í huga að öll verkefni sem flutt eru út á landsbyggðina auka við fjölbreytni og styrkja atvinnulíf viðkomandi svæðis.“

 

Þetta kom fram á fréttavefnum bb.is.

Sjá einnig: 

Hafa áhyggjur af töfum á vegabótum