Tröllin sem dagaði uppi / Jón Jónsson.

Síðustu árin hafa verið vinsælar og vel sóttar þjóðtrúarkvöldvökur í Sauðfjársetrinu á Sævangi við Steingrímsfjörð og sú þriðja verður annað kvöld, föstudag. Yfirskriftin er hrikaleg: Mannát, dauði og djöfull. Telja má víst að fjallað verði um heldur óhugnanleg atriði í íslenskri þjóðtrú og þjóðsögum - á gamansaman hátt að þessu sinni. Það er Dagrún Ósk Jónsdóttir þjóðfræðinemi við Háskóla Íslands sem heldur utan um kvöldvökuna og að venju verður á boðstólum yfirnáttúrulegt kaffi með kræsingum, sem og tónlistaratriði.

Þau sem flytja erindi á kvöldvökunni eru:

• Dagrún Ósk Jónsdóttir þjóðfræðinemi: Mannát á Íslandi
• Björk Bjarnadóttir umhverfis- og þjóðfræðingur: „Skrattinn fór að skapa mann ...“
• Jón Jónsson þjóðfræðingur: Þjóðtrú tengd dauðanum

Frítt verður inn á sýningar safnsins í tilefni dagsins fyrir þá sem vilja skoða þær sýningar sem eru uppi í Sævangi um þessar mundir:

• Sauðfé í sögu þjóðar (fastasýning Sauðfjársetursins)
• Brynjólfur Sæmundsson og störf héraðsráðunauta
• Manstu? Ljósmyndir Tryggva Samúelssonar
• Álagablettir

Skemmtunin óhugnanlega á Ströndum hefst kl. 20.30. Verð fyrir kvöldvöku og kaffi er 1.500 krónur.

Meðfylgjandi mynd tók Jón Jónsson af tröllunum í Drangavík í Kollafirði sem reyndu að grafa Vestfirði frá meginlandinu.