Byggingaframkvæmdir við Breiðafjörð: Endurbætur gerðar á hreiðrinu.

Að sögn Bergsveins Reynissonar á Gróustöðum í Reykhólahreppi hefur aðsóknin að vefmyndavélinni við arnarhreiðrið frá því að útsendingin „fór í loftið“ á föstudag verið langtum meiri en búist var við. Þannig voru yfir fjögur hundruð gestir inni á henni samtímis síðdegis í dag. Minnt skal á tengilinn neðarlega í dálkinum hér vinstra megin - borði með áletruninni Arnarsetrið, smellið á vefmyndavél. Líka birtist öðru hverju af handahófi stór sams konar borði neðan við efstu frétt á forsíðunni.

Að gefnu tilefni skal á það minnt, að yfir blánóttina sést ekki neitt - ekki vegna bilunar í tækjabúnaði heldur vegna náttmyrkurs. Arnarhjónin eru ekki með útiljós við heimili sitt. Þetta stendur smátt og smátt til bóta af náttúrlegum ástæðum eftir því sem nær dregur sumarsólstöðum.

Sjá einnig (þar á meðal athugasemdadálkinn þar fyrir neðan):

08.05.2009 Útsendingin frá arnarhreiðrinu „komin í loftið“