„Með Jesú í Múlasveitinni“
„Nú var tækifærið. Séra Elína Hrund Kristjánsdóttir, prestur á Reykhólum, kallaði til guðsþjónustu en messað er í kirkjunni einu sinni á ári. Það voru því fleiri á ferð á Múlanesinu um helgina en endranær, þótt sumarnot séu af jörðunum á nesinu og hlunninda gætt, meðal annars æðarvarps. Betra er að vera á háfættum fjórhjóladrifnum bíl til þess að komast til messu í Múlakirkju og þeirrar gerðar voru bílar á kirkjuhlaðinu, að undanskildum einum virðulegum Benz. Ökumaður hans hafði með lagi komið honum á nesið án þess að keyra undan honum hljóðkút eða setja gat á pönnuna.“
Ofanritað er klausa úr frásögn af kirkjuferð að Skálmarnesmúla um fyrri helgi, sem birtist í Fréttatímanum í síðustu viku undir fyrirsögninni Með Jesú í Múlasveitinni. Höfundurinn er ritstjóri blaðsins, Jónas Haraldsson, sem á ættir að rekja í Múlasveit. Með góðfúslegu leyfi hans er frásögnin birt í heild hér á vefnum undir Sjónarmið í valmyndinni vinstra megin.