Fyrir nokkrum dögum gekk Áki Guðni Karlsson þjóðfræðingur frá lokaverkefni sínu til meistaraprófs í þjóðfræði við Háskóla Íslands. Ritgerð hans ber heitið Menningartengd ferðaþjónusta á Vestfjörðum. Í tölvupósti að Reykhólum segir höfundur m.a.: „Mig langar til að þakka ykkur kærlega fyrir veitta aðstoð vegna meistaraverkefnis míns í þjóðfræði og sendi ykkur hérna tengil á ritgerðina.“

 

Í útdrætti í upphafi segir m.a.: „Ritgerðin fjallar um þróun menningartengdrar ferðaþjónustu á Vestfjörðum síðustu áratugi. Í rannsókninni er grafist fyrir um ástæður þess að fjöldi safna, setra og sýninga á Vestfjörðum hefur nær fjórfaldast á rúmum tíu árum. Forsendur þessarar þróunar eru raktar til þess tíma þegar fyrst var farið að ræða erindi íslenskrar menningarsögu í ferðaþjónustu snemma á 10. áratug 20. aldar og þess hvernig opinberu fjármagni til menningarmála hefur í auknum mæli verið beint í farveg verkefnastyrkja á síðustu tveimur áratugum.“

 

Hér er tengillinn á ritgerðina (pdf-skjal, 168 blaðsíður). Meðfylgjandi mynd er úr ritgerðinni.