Mesta ferðahelgi sumarsins á Reykhólum
Þó að óvenjumargir bílar hafi verið við Hólakaup á Reykhólum á fjórða tímanum í dag (mynd nr. 1) segir Guðrún Guðmundsdóttir að samt hafi öllu fleiri komið í búðina í gær. Hún segir að jafnan komi margir sem eru að fara út í Breiðafjarðareyjar með Eyjasiglingu og síðan komi aftur dálítil skriða að lokinni eyjaferðinni. Myndir nr. 2 og 3 eru frá tjaldsvæðinu við Grettislaug í jaðri þorpsins á Reykhólum, þar sem er prýðileg aðstaða fyrir tjaldvagna og húsbíla og slíkt. Það sem af er þessari helgi hefur verið meiri almenn umferð ferðafólks á Reykhólum en nokkra aðra helgi í sumar. Aftur á móti er ekkert ættarmót á Reykhólum að þessu sinni en á samkomum af því tagi geta gestir skipt hundruðum.
Um sextíu manns hafa komið á upplýsingaskrifstofu ferðafólks á Reykhólum í dag. Þar af hafa hátt í fimmtíu farið áfram inn á hlunnindasýninguna. Aðeins einu sinni í sumar hafa fleiri litið þar inn á einum og sama deginum. Það var þegar Breiðfirðingafélagið kom í heimsókn á Reykhóla í lok júní og dvaldist eina helgi.