Uppfærsla Leikfélags Hólmavíkur á gamanleiknum sprellfjöruga Með táning í tölvunni eftir Ray Cooney hefur fengið fádæma góða aðsókn. Heimamaðurinn Arnar S. Jónsson leikstýrir og fara sjö leikarar með hlutverk. Þrjár sýningar voru á Hólmavík um páskahelgina og hafa þegar rúmlega 300 manns séð leikinn. Búið er að ákveða að næstu sýningar verði á Hólmavík laugardagana 7. og 21. maí.

 

Þá er áformað að sýna á Patreksfirði, Þingeyri og í Bolungarvík rétt fyrir sjómannadag og enda síðan í Árneshreppi kringum 17. júní.

 

Leikfélag Hólmavíkur á 30 ára afmæli á morgun, þriðjudaginn 3. maí. Auk uppfærslunnar á táningnum er ætlunin að minnast afmælisins með fjölbreyttum hætti síðar á árinu, segir Kristín Sigurrós Einarsdóttir, formaður félagsins.

 

18.04.2011  Táningur í tölvunni á Hólmavík