Reykhóladagurinn sem haldinn er síðasta laugardaginn í ágúst hefur fest sig í sessi á síðustu árum og þátttakan verður stöðugt meiri. Að þessu sinni hófst dagskráin með tveimur viðburðum um morguninn. Annars vegar fóru nemendur úr Reykhólaskóla á móti nemendum Hólmavíkurskóla upp á Arnkötludal þar sem skipst var á vinakveðjum. Á sama tíma var Björn Samúelsson leiðsögumaður í gönguferð á Geitafell og tóku tíu manns þátt í þeirri ferð.

 

Síðdegis var samfelld skemmtidagskrá við Hlunnindasýninguna þar sem allir gátu fundið eitthvað við sitt hæfi, svo sem hestaferðir, gamlar dráttarvélar, bátasýningu og hoppukastala. Á sveitamarkaðinum kenndi ýmissa grasa, ef svo má segja, og mátti þar m.a. finna kökur, þaratöflur, hundanammi, sultur, brauðblöndur og tómata. Vinafélag Grettislaugar var með tombólu þar sem vinningarnir voru ekki af verra taginu. Einnig var hægt að næra sig með ýmsum hætti þar sem Kvenfélagið Katla seldi vöfflur og kakó, Vinafélag Grettislaugar seldi pylsur og Ísgerðin á Erpsstöðum seldi ís.

 

Leikhópurinn Lotta var með leiksýningu í Kvenfélagsgarðinum. Lítið eitt blés á mannskapinn en það gerði ekkert til þar sem sýningin var frábær.

 

Mikill mannföldi safnaðist saman í íþróttahúsinu á Reykhólum um kvöldið og var metaðsókn í matinn, þar sem hægt var að gæða sér á lambakjöti, selkjöti og lunda. Nýuppteknar kartöflur voru á borðum og salat sem var allt ræktað í heimabyggð.

 

Helga Braga Jónsdóttir var veislustjóri kvöldsins og hljómsveitin Festival lék fyrir dansi langt fram eftir nóttu. Einnig kom fram hljómsveitin Smámæltu rassálfarnir ásamt söngkonum.

 

Reykhóladagurinn var að flestra mati vel heppnaður. Nefndin sem annaðist undirbúning og skipulag dagskrárinnar vill þakka öllum sem lögðu hönd á plóg til þess að gera daginn okkar sem bestan.

 

Meðfylgjandi svipmyndir tók Þórarinn Ólafsson. Smellið á myndirnar til að stækka þær. Margar fleiri er að finna undir Ljósmyndir > Myndasyrpur > Reykhóladagur 2009 (ÞÓ) í valmyndinni vinstra megin á síðunni.