Mígandi hamingja á Hólmavík! Þannig hljóðar yfirskrift tilkynningar um Hamingjudaga á Hólmavík sem standa yfir núna frá fimmtudegi og fram á sunnudag. Meðal þess sem finna má á Hamingjudögum eru Laglausi kórinn, léttmessa, hamingjuhlaup, hnallþórur, Furðuleikarnir og fiskur. Eftirfarandi kemur fram í tilkynningunni sem er frá Kristínu Sigurrós Einarsdóttir, framkvæmdastjóra Hamingjudaga, en hún veitir jafnframt nánari upplýsingar í síma 867 3164.

 

Strandamenn eru ekki venjulegt fólk og því er það engin venjuleg dagskrá sem í boði verður á Hamingjudögum Strandamanna sem nú eru haldnir á Hólmavík í sjötta sinn. Strandamenn eru sem betur fer ekki við hestaheilsu og því setja hrossasjúkdómar ekki strik í reikninginn þegar þeir ætla að gera sér glaðan dag.

 

Boðið er upp á gríðarlega fjölbreytta dagskrá þar sem grín og glens eru í fyrirrúmi en þó fyrst og fremst helber hamingja enda er það vísindalega sannað að Strandamenn eru hamingjusömustu íbúar jarðarkringlunnar. Á Ströndum brosir hver einasti maður hringinn, og jafnvel einn og hálfan, hvernig sem viðrar og sama hvaða hörmungar dynja á heimsbyggðinni.

 

Meðal þess sem hægt er að berja augum og taka þátt í á Hamningjudögum eru kassabílasmiðja, hamingjuhlaup, götuleikhús, brúðuleikhús, hnallþóruhlaðborð, söngvakeppni barnanna, hamingjudansleikur, léttmessa í Hólmavíkurkirkju, furðufataball fjölskyldunnar og Furðuleikar Sauðfjársetursins, þar sem meðal annars er keppt í kvennahlaupi, trjónufótbolta og fleiri stórfurðulegum íþróttagreinum.

 

Þá koma fram á hátíðinni tónlistarmennirnir Svavar Knútur og Raddbandafélag Reykjavíkur, Geirmundur Valtýsson, hljómsveitin Hraun og Jón á Berginu. Enn fremur töframaðurinn Jón Víðis og tveir af undarlegustu mönnum landsins, þeir Gísli Einarsson fréttamaður og Rögnvaldur gáfaði, láta gamminn geisa í uppistandi við setningu hátíðarinnar á Kópnesi.

 

Hvað sem öðru líður á það að vera lýðum ljóst að hamingjan á lögheimili á Ströndum og það getur hver sem er sannreynt um þessa helgi.

 

Dagskrá Hamingjudaga á Hólmavík