Helga og Þórunn Játvarðardætur frá Miðjanesi í Reykhólasveit voru talsvert berjabláar á höndunum að versla í Hólakaupum á Reykhólum. Þórunn hefur núna verið í berjamó í Reykhólasveit hátt í viku á nærri hverjum degi. Hún segir ótrúlega mikið af berjum og töluvert mikið af öllum sortum, aðalbláberjum, bláberjum og krækiberjum. Þau séu að vísu talsvert missprottin og sprettan seinna á ferðinni en venjulega vegna þurrkatíðarinnar. „En þau eru orðin ótrúlega góð. Aðalbláberin eru yfirleitt nokkuð vel sprottin, krækiberin eru ennþá fremur smá en bláberin eru mjög misjöfn. Sums staðar eru enn bara grænjaxlar en annars staðar eru þau fullsprottin.“

Þórunn kemur yfirleitt á hverju ári vestur í berjamó. „Venjulega byrja ég að tína kringum verslunarmannahelgi en það var auðvitað ekki hægt núna. Það var ekki fyrr en eftir miðjan mánuðinn sem eitthvað var sprottið að ráði.“

Úr því að fjallað er um þennan jarðargróða má nefna, að núna um helgina er hátíðin Bláberjadagar haldin í fyrsta sinn í Súðavík í Álftafirði við Djúp. Í tengslum við hátíðina verður á sunnudag „bláberjamessa“ í kirkjunni á Eyri í Seyðisfirði við Djúp.