Minnismerkin að Tjarnarlundi í Saurbæ
Minnisvarðar Jóns Sigurpálssonar myndlistarmanns á Ísafirði um þrjá úr hópi merkustu sona og innbyggjara hins mildilega byggðarlags Saurbæjar í Dalasýslu voru afhjúpaðir við Tjarnarlund í Saurbæ um síðustu helgi, eins og hér kom fram. Synir þessir eru söguritarinn Sturla Þórðarson og skáldin Stefán frá Hvítadal og Steinn Steinarr. Minnismerkin sem eru úr gleri og stáli skóp listamaðurinn eftir því hvernig persónur rithöfundarins og skáldanna komu honum fyrir sjónir.
Nánar er greint frá hátíðinni að Tjarnarlundi á vefnum strandir.is og þar eru meðfylgjandi myndir fengnar. Þar getur að líta fleiri myndir frá þessum hátíðlega atburði. Einnig var sagt frá viðburði þessum hér á vefnum og rakin nokkur æviatriði merkismannanna þriggja.
Í kynningum var víðast hvar eða jafnvel hvarvetna talað um „skáldin þrjú". Hins vegar verður söguritarinn Sturla Þórðarson seint talinn til skálda í venjulegri merkingu þess orðs – nema þá að menn séu þeirrar skoðunar að rit hans um atburði 13. aldar á Íslandi og fleira séu skáldskapur.