„Mig langar að vekja athygli á því að þeir félagar Lambi og Sturla, sem hafa kennt Aftur í nám, námskrá fyrir lesblinda, eru væntanlegir á Vestfirði nú í haust. Fyrsta koma þeirra er upp úr 20. september og síðan koma þeir aftur í október og nóvember“, segir Kristín Sigurrós Einarsdóttir, verkefnastjóri í útibúi Fræðslumiðstöðvar Vestfjarða á Hólmavík. Síðar í haust er líka á döfinni tölvunámskeið fyrir lesblinda. „Endilega látið þetta berast til allra sem þið teljið að geti haft gagn af og áhuga á þessum námskeiðum“, segir Kristín Sigurrós. „Lesblindir hafa oft slæma skólareynslu og það er um að gera að hvetja þá til að hafa óhikað samband, við reynum okkar besta til að taka vel á móti fólki.“

Þeir Lambi og Sturla ætla að kenna námskrána Aftur í nám, sem skiptist í tvennt:

• Ron Davis leiðréttingu fyrir einstaklinga. Leiðréttingin tekur 40 stundir og fer því heil vinnuvika í hana fyrir hvern einstakling. Áhugasömum er bent á að athuga rétt sinn til að taka frí úr vinnu án þess að tapa launum og rétt sinn til að fá námskeiðsgjöldin greidd úr sínu stéttarfélagi. Athugið líka að hægt er að fá þennan fyrri hluta námskeiðsins kenndan hvar á svæðinu sem er.
• Síðar verður boðið upp á hina 55 tímana sem námskráin inniheldur (tölvur, íslenska og sjálfsstyrking) og verða þeir kenndir sameiginlega fyrir stærra svæði. Líklegt er að sú kennsla geti farið fram á tveimur helgum.

Einnig er vakin athygli á tölvunámskeiði fyrir lesblinda dagana 8.-10. nóvember. Snævar Ívarsson, sem sjálfur er lesblindur, kennir á því námskeiði og hafa námskeið hans fengið frábærar viðtökur.

Hafið samband við Kristínu Sigurrós í tölvupósti eða í síma 451 0080.

Lesblind.is