Móðurlaust folald í garði við hús
Þegar maður nokkur á Reykhólum leit út í gærmorgun sá hann ekki betur en sauðkind væri á beit í garðinum kringum hús Guðrúnar Guðmundsdóttur og Björns Fannars Jóhannessonar að Hellisbraut 50. Komu þá í hugann garðarollurnar svokölluðu sem garðeigendum á Ísafirði þóttu talsvert hvimleiðar fyrir kannski tuttugu árum eða þar um bil og sóttust mjög eftir því að éta fögur sumarblóm á næturþeli. En svo reisti „kindin“ í garðinum hjá Guðrúnu og Fanna höfuðið, og þá leyndi sér ekki að þetta var folald.
Blessað folaldið missti móður sína í síðustu viku. Þá var það fyrst haft í fjárhúsunum hjá Tuma bónda á Reykhólum en var síðan flutt í garðinn hjá Guðrúnu og Fanna. Sveitungar voru mjög hjálplegir. Má þar nefna að Gústaf og Herdís á Miðjanesi og Daníel á Ingunnarstöðum sáu folaldinu fyrir mjólk. Eins og vænta mátti gerðu margir sér ferð í garðinn við Hellisbrautina til að skoða folaldið. Á myndunum má sjá að blessað litla folaldið undi sér vel með börnum og fullorðnum.
Auglýst var á netinu eftir fósturmóður fyrir folaldið. Það bar tilætlaðan árangur og fór það í gær suður í Hafnarfjörð til fósturmömmu sinnar. „Nú vonum við bara að þetta gangi allt vel,“ segir Sólveig Guðmundsdóttir, systir Guðrúnar. Þess má geta, að folaldið hlaut nafnið Aris.
Hanna Dalkvist, mnudagur 08 jn kl: 18:03
Ég get allavega staðfest að það er alveg fínt að vera í Hafnarfirði, svo vonandi líður því vel :)