Andrea Björnsdóttir oddviti í viðtalinu við Kristján Má Unnarsson á Stöð 2.

Vegagerðin stefnir að því að bjóða út fyrir áramót vegarlagningu með þverun Kjálkafjarðar og Mjóafjarðar, að langmestu leyti í Múlasveit í Reykhólahreppi en allra vestast innan lögsögu Vesturbyggðar (mörkin eru við Skiptá í austanverðum Kjálkafirði). Með þessari framkvæmd styttist Vestfjarðavegur 60 um átta kílómetra. Ítarlega hefur áður verið fjallað um þessa vegarlagningu hér á vefnum. Kristján Már Unnarsson fréttamaður á Stöð 2 var á ferð um sunnanverða Vestfirði og ræddi m.a. við Andreu Björnsdóttur, oddvita Reykhólahrepps. Hún segir að þarna verði friðsælt og gaman fyrir ferðafólk að skoða þessa paradís.

Núna er þarna 24 kílómetra langur malarvegur með kröppum beygjum og blindhæðum og fjórum einbreiðum brúm.

Vegagerðin vill í staðinn beinan og breiðan malbiksveg og stytta leiðina um þriðjung með því að fara þvert yfir bæði Kjálkafjörð og Mjóafjörð inn af Kerlingarfirði en Vegagerðin segir mjög snjóþungt í botni fjarðanna. Brýrnar yfir firðina verða hafðar stórar, 160 og 116 metra langar, til að tryggja eðlileg vatnaskipti milli flóðs og fjöru.

Ekki er vitað til þess að samtök eða landeigendur leggist gegn framkvæmdinni. Búist er við að Skipulagsstofnun gefi út álit sitt á umhverfisáhrifum um miðjan næsta mánuð. Vegagerðin vonast til að bjóða út verkið fyrir áramót og því verði lokið eftir þrjú ár.

Smellið hér til að sjá og heyra fréttina á Stöð 2 í kvöld.

_______________________________________________________________________________________________

Alvanaleg missögn er í skjátexta í umræddri frétt. Á einum stað stendur Úr Mjóafirði á Barðaströnd.

Sjá hér um það efni.