Milli áttatíu og níutíu manns komu og samfögnuðu Olgu Sigvaldadóttur á Hamarlandi í Reykhólasveit og fjölskyldu hennar í samsæti í tilefni af sextugsafmælinu í matsalnum í Reykhólaskóla á laugardagskvöldið. Fagnaðurinn byrjaði um áttaleytið og stóð allt fram til klukkan þrjú um nóttina. Gústaf Jökull Ólafsson tengdasonur Olgu var veislustjóri. Meðal viðburða má nefna, að nokkrar konur úr kirkjukórnum sungu brag um afmælisbarnið, sem Guðmundur Arnfinnsson frá Hlíð orti, og má lesa hann hér fyrir neðan. Myndir frá fagnaðinum eru komnar í Ljósmyndir > Myndasyrpur (Olga á Hamarlandi sextug) í valmyndinni hér vinstra megin.

 

Sjá einnig:

Afmælisfagnaður á Reykhólum á laugardag

 

 

Bragur ortur í tilefni af sextugsafmæli Olgu á Hamarlandi

          Lag: Góða tungl, um loft þú líður ...

 

          Olgu nú við árnum heilla,

          afmæli á kona sú,

          húsfreyjan á Hamarlandi

          hún er mesta sómafrú,

                    mikið hún af mörkum leggur,

                    margháttuð við félagsstörf,

                    fús í þágu sveitar sinnar

                    sífellt bæta vill úr þörf.

 

          Olga gæðir yl og birtu

          okkar litla samfélag,

          fyrir tryggð og félagsanda

          flytja viljum henni brag,

                    látum söng af hjarta hljóma,

                    hyllum nú af lífi og sál

                    Olgu, sem er ljúf í lundu,

                    líka þó að syrti í ál.

 

          Megi Olga lengi lifa,

          lán í hennar falli skaut,

          hún á skilið hrós í eyra,

          hógvær fetar ævibraut.

                    Margar góðar, glaðar stundir

                    geymast liðnum dögum frá,

                    Olgu þökkum afbragðs kynni,

                    okkur vöknar hreint um brá.

 
          - Guðmundur Arnfinnsson frá Hlíð.