Myndir frá fermingu í Garpsdal á hvítasunnudag
Líkt og flest annað hefur það bæði kosti og galla að fermast í lítilli sveitakirkju. Fermingarsystkinin eru færri en almennt gerist en athöfnin er hins vegar persónulegri. Þetta gerist ekki gleggra en við fermingarmessu í kirkjunni gömlu og hlýlegu í Garpsdal við Gilsfjörð á hvítasunnudag þar sem einn piltur var fermdur, Jósep Friðrik Guðbjörnsson, sonur Rannveigar Harðardóttur og Guðbjörns Jóseps Guðjónssonar. Garpsdalskirkja var fullsetin og um hundrað manns sátu síðan fermingarveisluna sem haldin var í Bjarkalundi, elsta sveitahóteli landsins, sem tekið var í notkun fyrir sextíu og tveimur árum.
Myndirnar sem fylgja voru teknar í kirkjunni í Garpsdal og síðan í Bjarkalundi. Raunar þarf ekki texta með hverri mynd. Prestur var séra Elína Hrund Kristjánsdóttir. Á tveimur síðustu myndunum er Jósep Friðrik ásamt ömmu sinni í móðurætt og afa sínum og ömmu í föðurætt (smellið á myndirnar til að stækka þær).
Kirkjan í Garpsdal er senn hálfáttræð og þannig nokkru eldri en Bjarkalundur. Hún var byggð á árunum 1934-35 eftir alkunnri teikningu Guðjóns Samúelssonar húsameistara ríkisins og vígð 16. júní 1935. Altaristöfluna málaði Brynjólfur Þorláksson.