Myndir frá jafndægrablíðu við Breiðafjörð
Þessar myndir voru teknar á Reykhólum og við Reykhólahöfn á sjöunda tímanum í kvöld. Þá var veður mjög snúið frá leiðindum síðustu dægra; nánast heiður himinn fyrir utan slæður í norðri og vestri, hæg austanátt, hiti skammt undir frostmarki. Tveir dagar frá jafndægrum þannig að núna er dagurinn orðinn lengri en nóttin rétt eina ferðina enn. Mjög var lágsjávað og gufur af heitu vatni óvenjumiklar bæði við Þörungaverksmiðjuna og Norðursalt.
Á mynd nr. 2 er Hafratindur fyrir miðju, á síðasta ári kjörinn einkennisfjall Dalabyggðar. Hann telst 923 metra hár og þannig á svipuðu róli og Esjan, einkennisfjall Reykvíkinga og jafnframt ýmissa sem ólust upp í Mosfellssveitinni forðum daga. Reyndar er hann ekki hæstur fjalla í Dalabyggð; það mun vera Tröllakirkja á mótum Dalasýslu, Strandasýslu og Mýrasýslu, sem telst ná 1001 metra yfir sjávarmál.
Síðasta myndin tekin og birt því til staðfestingar, að Reykhólakirkja stóð af sér stormviðrið mikla í fyrradag. Seinni aldirnar voru kirkjur líklega rokgjörnustu og fokgjörnustu hús hérlendis; fæstar þá af steini gjörvar.