« 1 af 7 »

Sveitarstjórnarfólk í Reykhólahreppi sat í dag námskeið fyrir kjörna fulltrúa í sveitarstjórnum, sem haldið var í Hnyðju á Hólmavík á vegum Sambands íslenskra sveitarfélaga og Fjórðungssambands Vestfirðinga. Meðfylgjandi myndir voru teknar við það tækifæri. Þar má meðal annars sjá hvar Gunnlaugur Júlíusson hagfræðingur hjá Sambandi íslenskra sveitarfélaga útskýrir málin og líka risavaxna leðurskjaldböku.

Gunnlaugur er ekki síður þekktur sem ofurhlaupari en sem hagfræðingur. Varðandi skjaldbökuna má segja að hún sé eitt af einkennismerkjum Hólmavíkur á síðari árum. Gata þar við höfnina heitir Skjaldbökuslóð í minningu skjaldbökunnar sem Einar Hansen fann í Steingrímsfirði fyrir hálfri öld.