12. júní 2009 |
Netkaffi á Skriðulandi í Saurbæ
Skriðuland í Saurbæ er gamalgróinn verslunar- og veitingastaður við þjóðveginn fáeina kílómetra sunnan við Gilsfjarðarbrú. Staðurinn stendur hátt og þaðan er gott útsýni yfir sveitina. Dóróthea (Dóra) Sigvaldadóttir frá Hafrafelli í Reykhólasveit rekur Skriðuland ásamt sínu fólki. Í sumar er opið alla daga vikunnar frá kl. níu á morgnana til kl. tíu á kvöldin og grillið er opið á sama tíma.
Nú er komið netkaffi í Skriðuland þar sem hægt er gegn vægu gjaldi að komast í tölvu, á netið og prenta út. Keyptir eru inneignarmiðar sem gilda í 15, 30 eða 60 mínútur. Þegar fólk kaupir inneignarmiða á netið fylgir honum kaffibolli.
Eins og sumir hafa komist að raun um hefur bílaþvottaplanið á Skriðulandi verið ótengt um nokkurt skeið en það á að komast í gagnið á næstu dögum.