Feðgarnir Magnús og Stefán á Seljanesi og Eyvi kaupmaður ásamt eldgömlum Massey-Ferguson sem er eins og nýr.

Unnsteinn (Hjalli) og Guðmundur á Grund ásamt Hörpu. Kristján Steinn við stýrið en tíkin Perla fylgist með.

Einn gamall á leiðinni að verða nýr.

« 1 af 3 »

Eftir þriggja tíma heimsókn að Seljanesi í Reykhólasveit í sumar fór Eyvi í Hólakaupum að hugsa um hvernig væri hægt að styrkja strákana á Seljanesi og Grund og launa þeim fyrir allt það óeigingjarna starf sem þeir inna af hendi. Söfnin af forntraktorum og fornbílum á þessum bæjum eru landsþekkt þó að ennþá fleiri mættu alveg vita af þeim. Að baki þessu liggur þrotlaus elja í fjölmörg ár. Allir eru velkomnir að skoða og aldrei tekin króna fyrir. Auk þess eru tækin gömlu og glæsilegu „fjölmenn“ á Reykhólum á stórhátíðum eins og þegar sextán forntraktorar óku í lest á Reykhóladögum í sumar. Og ekki hefði dráttarvélakeppnin verið haldin án Grundarbræðra og vélanna þeirra.

Eyvi færði þetta í tal við Hörpu ferðamálafulltrúa og hún bauð að koma á móti með peninga úr styrknum sem Reykhóladagarnir fengu. Niðurstaðan varð sú að Grundarbræður og Seljanesfeðgar fengu inneignarkort fyrir bensíni og olíu hjá N1 og jafnframt var þeim boðið samstarf við Markaðsstofu Vestfjarða sem veitir þeim endurgjaldslaust sýnileika bæði á vefnum westfjords.is og í bæklingi sem verið er að gefa út.

Þau Eyvindur og Harpa skruppu síðan í gær að Seljanesi og Grund þar sem strákarnir fengu styrkina. Þetta kom þeim öllum fullkomlega á óvart en viðurkenningin gladdi þá mikið. Jafnframt tóku Eyvi og Harpa myndir hvort af öðru sitt á hvorum staðnum ásamt bræðrum og feðgum og raunar einum hundi í viðbót.