Gylfi Þór Þórisson, sem ráðinn hefur verið sveitarstjóri Reykhólahrepps, er 43 ára að aldri. Hann er uppalinn í sveit á Snæfellsnesi en hefur starfað og búið erlendis til lengri og skemmri tíma auk þess að hafa búið úti á landi sem og í Reykjavík. Hann hefur um árabil stundað eigin rekstur ásamt eiginkonu sinni. Gylfi Þór lauk árið 1994 BA-prófi í markaðsfræðum og almannatengslum frá ríkisháskólanum í Arizona í Bandaríkjunum. Auk þess hefur hann lokið meistaranámi í markaðsfræðum og alþjóðaviðskiptum frá Háskóla Íslands að öðru leyti en því að hann á eftir að skila lokaritgerð á næsta ári.

 

Gylfi Þór er kvæntur Katrínu Lillý Magnúsdóttur, uppeldis- og menntunarfræðingi. Saman eiga þau börnin Inga Hrafn, 7 ára, og Hrefnu Maríu, 2 ára. Fyrir á hann tvær dætur, Sigríði, 14 ára, og Telmu Rut, 18 ára.