Gústaf Gústafsson hefur verið ráðinn forstöðumaður Markaðsstofu Vestfjarða frá 1. ágúst. Hann mun sinna verkefnum á sviði markaðssetningar Vestfjarða í samvinnu við hagsmunatengda aðila. Gústaf hefur margþætta reynslu af markaðsmálum og var markaðs- og fjáröflunarstjóri Krabbameinsfélags Íslands frá ársbyrjun 2006 til síðustu mánaðamóta. Hann byggði upp og var ábyrgur fyrir verkefnum eins og Mottumars og Bleika slaufan, sem allir landsmenn ættu að þekkja.
 
Gústaf er kerfisfræðingur en hefur sérhæft sig í markaðsmálum undanfarinn áratug og lauk meðal annars námi í samhæfðum markaðssamskiptum hjá Háskólanum í Reykjavík núna í vor. Gústaf er fimm barna faðir og kvæntur Sigrúnu Bragadóttur viðskiptafræðingi. Stjórn Markaðsstofu Vestfjarða býður Gústaf hjartanlega velkominn til starfa, segir í tilkynningu.

 

Gústaf tekur við af Jóni Páli Hreinssyni sem gegndi starfinu í nokkur ár en hætti um síðustu mánaðamót. „Brotthvarf mitt úr störfum er í fullri sátt við stjórn Markaðsstofunnar og skil ég sáttur við mín störf í þágu ferðaþjónustunnar á Vestfjörðum“, segir í tilkynningu frá Jóni Páli. Hann segist hafa verið heppinn í störfum sínum sem forstöðumaður Markaðsstofu Vestfjarða og unnið með fjölda hæfileikaríks fólks í vestfirskri ferðaþjónustu og öðlast ómetanlega reynslu og þekkingu á þessum fjórum árum sem hann hefur starfað við Markaðsstofu Vestfjarða.

 

„Þessi fjögur ár hafa verið viðburðarík og hef ég séð ferðaþjónustuna á Vestfjörðum vaxa og dafna. Komum ferðamanna hefur fjölgað mikið á undanförum árum og hlutur Vestfjarða í ferðaþjónustu á Íslandi hefur aukist hlutfallslega mest miðað við aðra landshluta. Ég skil sáttur við störf mín í Markaðsstofunni og óska ferðaþjónustu á Vestfjörðum alls hins besta, enda er ég þess fullviss þess að mikilvægi hennar í atvinnu- og efnahagslífi Vestfjarða muni aukast á komandi árum, öllum íbúum til hagsbóta.“