Útsvarsprósentan í Reykhólahreppi á næsta ári verður óbreytt frá þessu ári. Sama er að segja um fasteignaskatt, fráveitugjald og vatnsgjald. Eina breytingin í þessum efnum varðar hækkuð frítekjumörk elli- og örorkulífeyrisþega vegna fasteignaskatts. Þetta var ákveðið á fundi sveitarstjórnar í gær.

Álagningargjaldstig útsvars á tekjur ársins 2017 verður óbreytt frá þessu ári eða 14,52%. Auk 13,28% útsvars eru 1,24% vegna tilfærslu þjónustu við fatlaða frá ríki til sveitarfélaga.

Fasteignaskattur, fráveitu- og vatnsgjald verða óbreytt frá fyrra ári:

Fasteignaskattur A 0,50%

Fasteignaskattur B 1,32%

Fasteignaskattur C 1,65%

Fráveitugjald 0,20%

Vatnsgjald 0,50%

Lóðarleiga 4% (af nýjum lóðum)

Sveitarstjórn veitir eins og áður afslátt til elli- og örorkulífeyrisþega sem eiga lögheimili og búsetu í Reykhólahreppi. Þeir njóta 100% afsláttar af fasteignaskatti af einni íbúð ef árstekjur fara ekki yfir þrjár og hálfa milljón króna hjá einstaklingi og fimm milljónir hjá hjónum. Viðmiðunarmörk tekna hækka þannig milli ára um hálfa milljón króna hjá einstaklingi og eina milljón hjá hjónum.