Andrea ásamt mæðrum og börnunum (í peysunum sem hún hefur prjónað).

Oddvitinn og börnin tíu, en ellefta barnið er flutt norður í land ásamt fjölskyldu sinni.

Hér er Andrea með þá elstu sem allt byrjaði á, hana Málfríði Lilju á Hríshóli, og tvo nýjustu íbúa Reykhólahrepps, dömuna á Gróustöðum og Ebbu Sif á Reykhólum.

Einar Valur í Fremri-Gufudal, Málfríður Lilja á Hríshóli, Ebba Sif á Reykhólum, nýjasti íbúinn okkar á Gróustöðum og Emilía Karen á Reykhólum ásamt oddvitanum sínum.

« 1 af 4 »

Síðasta hálft annað árið hefur Andrea Björnsdóttir á Skálanesi, oddviti Reykhólahrepps, prjónað peysur á alla nýbura í sveitarfélagi sínu. Núna eru peysurnar orðnar ellefu og jafnmörg sokkapör að auki. Það er ekki lítið í sveitarfélagi þar sem íbúarnir eru rétt um 270. Í vikunni komu nær allar mæðurnar og börnin saman til myndatöku ásamt Andreu, fyrir utan að ein fjölskyldan er flutt úr hreppnum. „Öll hin tíu mættu, flest hress en sum pínu veik og önnur nýfædd,“ segir Andrea.

Fylgst hefur verið með framvindu þessa skemmtilega máls hér á Reykhólavefnum og ásamt myndum greint frá a.m.k. flestum nýju börnunum í Reykhólahreppi ef ekki öllum, eftir því sem fæðingunum hefur undið fram. Í fyrstu fréttinni undir árslok 2012 segir m.a.:

Andrea Björnsdóttir á Skálanesi er oddviti Reykhólahrepps og stöðu sinnar vegna ber henni að stuðla að fólksfjölgun í sveitarfélaginu. Þess vegna færði hún það í tal við Vilberg Þráinsson á Hríshóli snemma á þessu ári, að allsendis ótækt væri ef ekkert barn myndi fæðast í Reykhólahreppi á árinu 2012.

„Ég hélt hvatningarræðu,“ segir hún, „og lofaði að prjóna peysu á barnið ef hann brygðist snöfurmannlega við.“

Og hvernig brást hann við?

Það kemur fram hér.