Svo merkilega hittist á, að naumast var fyrr búið að setja hér inn á vefinn í gærkvöldi frétt um þingsályktunartillögu um rannsóknir á nýtingu sjávarorku hérlendis en rafmagnið fór af Vestfjarðakjálkanum. Í greinargerð með tillögunni kemur fram, að rannsóknir bendi til þess að sjávarfallavirkjun í vegþverun Þorskafjarðar í Reykhólahreppi myndi gera Vestfirði sjálfum sér næga um raforku. Sjá næstu frétt hér á undan. Rafmagnstruflanirnar á Vestfjörðum í gærkvöldi urðu vegna útleysingar á Vesturlínu í Glerárskógum í Dalabyggð, samkvæmt upplýsingum á vef Landsnets.

 

Eitthvað munu truflanirnar hafa verið mismunandi eftir svæðum á Vestfjörðum. Á fésbókarsíðum fólks á ýmsum stöðum á Vestfjörðum og allt til Bolungarvíkur er getið um rafmagnsleysi í gærkvöldi en þó misoft og mislengi. Á Reykhólum fór rafmagnið fjórum sinnum á nokkrum klukkutímum en ekki lengi í senn.