Ólafsdalshátíð verður haldin í sjötta skipti sunnudaginn 11. ágúst, fjölbreytt og fjölskylduvæn að vanda. Strax á laugardeginum er í boði gönguferð með leiðsögn með fjallsbrúnum umhverfis Ólafsdal og síðar um daginn tóvinnunámskeið fyrir börn og ungmenni í samstarfi við Heimilisiðnaðarfélag Íslands. Á sunnudeginum, aðalhátíðisdeginum, hefst markaður með Ólafsdalsgrænmeti og fjölbreytt vandað handverk kl. 12. Hátíðardagskrá hefst síðan kl. 13.

Þar mun m.a. Illugi Gunnarsson mennta- og menningarmálaráðherra halda ræðu. Söngkonan góðkunna Sigríður Thorlacius syngur fyrir gesti við undirleik Guðmundar Óskars Guðmundssonar bassaleikara og leikhópurinn Lotta sýnir Gilittrutt. Auk þess verða þau Kolfinna Jóhannesdóttir, rektor Menntaskóla Borgarfjarðar, Halla Steinólfsdóttir bóndi í Ytri-Fagradal og Bjarni Guðmundsson prófessor á Hvanneyri með erindi. Hestar fyrir börnin.

Frítt er inn á hátíðina en gestir eru hvattir til að kaupa lífrænt vottað Ólafsdalsgrænmeti og taka þátt í veglegu Ólafsdalshappdrætti. Í skólahúsinu hefur nú verið sett upp ný sýning sem nefnist Guðlaug og konunarnar í Ólafsdal. Einnig er til sýnis mynd um matarhefðir á Ströndum og við Breiðafjörð auk fastasýningar um sögu Ólafsdalsskólans.

Nánari upplýsingar veitir Þóra Sigurðardóttir í síma 896 1930 og í netfanginu olafsdalur@gmail.com.

► Dagskráin í heild