Öll aðalstjórn Breiðfirðingafélagsins endurkjörin
Snæbjörn Kristjánsson frá Breiðalæk var endurkjörinn formaður Breiðfirðingafélagsins á aðalfundi þess sem haldinn var fyrir nokkru. Auk hans var öll aðalstjórnin endurkjörin, en hana skipa Hörður Rúnar Einarsson, Hrönn Harðardóttir, Sigrún Halldórsdóttir, Bjarnheiður Magnúsdóttir, Inga Hansdóttir og Sigríður Karvelsdóttir. Í varastjórn eru Alvilda Þóra Elíasdóttir, Sturlaugur Eyjólfsson og Einar Pétursson.
Þriðja tölublað fréttabréfs Breiðfirðingafélagsins þetta ár er nýkomið út. Hægt er að lesa það á vef félagsins (sjá tengil hér fyrir neðan). Fram kemur á vefnum og í fréttabréfinu að margt er á döfinni hjá félaginu að venju. Af því sem næst stendur fyrir dyrum má nefna vorfagnaðinn sem verður í Breiðfirðingabúð við Faxafen að kvöldi síðasta vetrardags.
Myndin sem hér fylgir var tekin í fjölmennri sumarferð Breiðfirðingafélagsins að Reykhólum við Breiðafjörð á liðnu sumri. Formaðurinn Snæbjörn Kristjánsson er lengst til hægri á myndinni. Á síðasta ári varð félagið sjötugt en er kraftmikið og ber aldurinn vel eins og vænta má þegar Breiðfirðingar eiga í hlut.