Önnur leið en áður í Kvennahlaupinu á Reykhólum
Kvennahlaup ÍSÍ verður núna á laugardag, 13. júní. Á Reykhólum verður eins og venjulega hlaupið frá Grettislaug og lagt af stað kl. 11. Sú nýbreytni verður í hlaupinu að þessu sinni, að hlaupið verður út á Reykjanesið en ekki upp Miðhúsabrekkuna. Velja má um 2 km, 3 km, 5 km og 7 km. Frítt í sund fyrir þátttakendur og verður laugin opnuð kl. 12. Ungmennafélagið Afturelding í Reykhólahreppi sér um hlaupið og nýtur góðs af því.
Skráning og afhending Kvennahlaupsbola fer fram fyrir hlaup eða heima hjá Kolfinnu Ýri að Hellisbraut 8. Bolirnir eru með sama sniði og í fyrra, nema hvað núna eru þeir fjólubláir.
Mjög góð þátttaka hefur verið í Kvennahlaupinu á Reykhólum undanfarin ár og væntanlega breytist það ekki núna. Þátttökugjald er 1500 krónur fyrir 13 ára og eldri en 1000 krónur fyrir 12 ára og yngri. Posi á staðnum. Innifalið í þátttökugjaldinu eru bolurinn, sem er úr dry-fit efni með V-laga hálsmáli, og verðlaunapeningur. Nivea hefur einnig gefið konum glaðning að hlaupi loknu og verður svo líka núna.
Markmið Kvennahlaupsins er að hvetja og styðja konur á öllum aldri til heilsueflingar. Það höfðar til allra kvenna, þar sem hægt er að velja mismunandi vegalengdir. Engin tímataka er í hlaupinu og því ekki hlaupið nema til persónulegs sigurs. Naumast þarf að taka fram, að engin skylda er endilega að hlaupa þá leið sem farin er, enda má jafnan sjá í hlaupinu konur með barnavagna og konur sem leiða börn. Taka má fram, að þar er ekki tilskilið að um stúlkubörn sé að ræða, heldur eru sveinbörn ekki síður velkomin.
Kvennahlaupið er haldið sem næst kvenréttindadeginum 19. júní, þar sem höfðað er til samstöðu kvenna.
Fyrsta Kvennahlaupið var haldið 30. júní 1990 í tengslum við Íþróttahátíð ÍSÍ. Þá var hlaupið í Garðabæ og á sjö öðrum stöðum úti um land: Á Akureyri, Egilsstöðum, Ísafirði, Laugum í Þingeyjarsýslu, í Grundarfirði, Stykkishólmi og Skaftafellssýslu. Rúmlega tvö þúsund konur tóku þátt í hlaupinu í Garðabæ og um fimm hundruð konur á landsbyggðinni. Núna taka árlega um 16 þúsund konur þátt í hlaupinu á 90 stöðum hérlendis og 16 stöðum erlendis.
14.06.2014 Kvennahlaupið: Mjög góð þátttaka á Reykhólum