Sauðfjárveikivarnagirðingar á Vestfjörðum granda fé í stað þess að halda því á sínum stað, segja bændur í Reykhólahreppi. Þeir segja hvorki fjárveitingar í nýjar girðingar né til að hreinsa burt þær sem ónýtar eru. Sauðfjárveikivarnagirðingin yfir Þorskafjarðarheiði milli Reykhólahrepps og Strandabyggðar er ónýt, að mati Einars Hafliðasonar sauðfjárbónda í Fremri-Gufudal. Einnig segir hann varnargirðingu frá Kollafirði yfir í Ísafjarðardjúp vera gagnslausa í núverandi ástandi.

Lögum samkvæmt skal farga sauðfé sem fer milli varnarhólfa.

Einar segir ekki nóg með að sauðfé fari á milli hólfa, og sé þá fargað, heldur sé það sýnu verra að féð drepi sig á ónýtum girðingum. Hann segist hafa fengið þau svör frá Matvælastofnun, sem hefur þennan málaflokk á sinni könnu, að ekki væru til peningar í viðhald girðinganna og ekki heldur til að hreinsa upp ónýtar girðingar.

(Svæðisútvarp Vestfjarða).