Elsta starfandi sveitahótel á Íslandi, hótelið gamla en samt síunga Bjarkalundur í Reykhólasveit, verður opnað formlega á morgun, 1. maí, á sínu 64. starfsári. Að vísu hefur verið opið meira og minna að undanförnu með óformlegum hætti en núna um mánaðamótin fer eldhúsið í gang af fullum krafti. Þegar líður á mánuðinn og umferðin eykst verður hið vinsæla hlaðborð í hádeginu en á kvöldin eru bæði kjöt- og fiskréttir. Jafnframt er nú bætt við kökuhlaðborði um miðjan daginn.

 

Miklar framkvæmdir hafa verið kringum Hótel Bjarkalund síðustu misserin og einkum lögð áhersla á tjaldsvæðið og bætta aðstöðu fyrir húsbíla og þess háttar. Jafnframt hafa verið byggð sex smáhýsi rétt fyrir ofan hótelið til að auka gistirýmið. Hótelið stendur rétt við Berufjarðarvatn á eiðinu milli Berufjarðar og Þorskafjarðar, skammt innan við afleggjarann að þorpinu á Reykhólum.

 
Heimasíða Bjarkalundar