Ný sex kvölda lota í félagsvistinni hjá Barðstrendingafélaginu hefst annað kvöld, mánudag, og verður síðan spilað annan hvern mánudag. Fyrir hvert kvöld eru veitt verðlaun fyrir flesta og fæsta slagi. Ekki eru það peningaverðlaun heldur það sem stjórnanda dettur í hug hverju sinni; ostakörfur, bækur, geisladiskar, kaffikörfur o.s.frv. Boðið er upp á kaffi og kex nema á lokakvöldinu, þegar hefð er að hafa kaffi og ástarpunga.

„Við leggjum áherslu á létta og góða stemmningu og að allir séu velkomnir, bæði vanir og óvanir,“ segir Ólína Kristín Jónsdóttir, formaður Barðstrendingafélagsins.

Í lokin verða veitt verðlaun fyrir fjögur bestu kvöldin.

Aðgangseyrir er 500 krónur. Spilað er í félagsheimilinu Konnakoti, Hverfisgötu 5 í Reykjavík, 2. hæð.